D外國親戚都話我哋喺印度o既生活比起佢哋喺外國仲好，唔係我哋囂，都的確係o架﹗呵呵﹗印度人對我哋真係幾好o架，有時俾對印度人自己都仲要好，呵呵呵呵﹗真係、真係唔係幾好意思…﹗
好似咁，印度憲法規定要對我哋加以保護，有D聯邦仲有殺牛o既禁令o添，所以我哋喺印度都幾冇枉管，好少俾人Wen住喺屋企，直情喺好多地方都打橫o黎行。就算喺大城巿、一些高級公路上面，依然有我哋o既足迹，想去邊就邊，警察都好少理我哋o既。
好似過橋咁，人過我哋又過。哎呀﹗咁高，好得牛驚呀﹗都係唔好望下面啦﹗
行到攰，又可以隨時隨地瞓低閉下目、養下神，公路路口或者繁忙鬧巿都唔使俾面，司機都要等我哋o架。…好啦﹗等我搵周公傾下偈先﹗
仲有，一D印度人唔可以做o既嘢，我哋都有特權o架。好似喺唔少印度人平時沐浴o既河階(ghat)上面，印度人係一定要除鞋先俾行落去，又唔可以整污糟D地方喎，不過我哋牛就可以嘞，就算我哋係上面大小異便都唔使驚，仲有人幫我哋清理D「米田共」o添，巴閉呢﹗
平時，我哋D生活都幾得閒o架，唔使點做呀嘛﹗呵呵呵呵……咁，有時間咪周圍去散下步，呼吸下新鮮空氣囉；或者去海邊度下假咁，印度海岸線好長o既，去海邊都有好多選擇，咁多得揀，呢樣先最煩。呵呵…
不過，又唔好以為我哋淨係貪威識食咁敗家，我哋都好有用o架，亦都好識得追求充實o既牛生。係印度人日常生活入面，我哋都唔知幾勤力、幾有貢獻呀，一D拉車、載貨同耕田o既工我哋都一樣識得做，我哋D「米田共」除咗做肥料，曬乾咗仲可以做燃料o添。最重要o既係，印度人都係飲我哋D奶大，好多印度食物仲唔少得我哋D奶做原料o添﹗都咪話我哋唔自豪。
我哋都會有煩惱o既，牛生無常，好似生老病死，牛同人都一樣會經歷；同親人分開咗，都一樣會傷心孤獨o架。雖然我哋牛喺印度好受尊重，但係都有D牛好運滯，出世冇耐唔好彩遇到一D霸道o既主人，鎖住我哋，失囇自由。不過最令我哋苦惱o既係一D政治社會問題，所謂「成也牛牛，敗也牛牛」，雖然印度教徒唔食我哋，但係伊斯蘭教徒就唔同嘞，為咗殺我哋同唔殺我哋o既爭拗，呢兩派間唔中會鬥生鬥死，仲有可能見血o添，真係大吉利是嘞﹗作為牛，我哋梗係想好好地生活落去啦，好彩印度教係主流啫﹗ 唉﹗其實我哋牛係溫馴o既動物，當然唔鍾意打打殺殺啦，都唔明呢個世界D人點解咁無聊同浪費。
講咗咁耐，有D肚餓o添。嗯~，大部印度人對我哋牛真係好好o架，俾好多嘢食我哋，宜家諗起都流口水呀﹗
好多印度人會每日定時供應我哋三餐o既，就算我哋同佢哋非親非故，唔係佢哋養o既佢哋都唔會介意。有時我哋去到巿場菜攤、果欄搵食，食完就走，唔使say hi，都一樣心安理得o架﹗
最衰咪係D馬騮囉，成日同我哋搶嘢食，講起就勞氣﹗
就算去到孟買呢D國際都會，當地人都唔會嫌我哋失禮，會喺巿中心留一D地方o黎餵我哋，仲教下一代好好對我哋、俾D好嘢我哋食o添，哈﹗呢個妹妹真係又乖又得意啦﹗
。
早幾年呀，歐美瘋牛症肆虐，我哋好多遠房親戚病o既病，唔病死都避唔開D人o既魔掌，就咁就去咗，嗰陣呀，真係喊到我哋「牛咁眼」囉﹗我哋都唔知幾想申請D親戚o黎印度呢邊住，有個照應呀嘛，好多印度人仲心急過我哋，仲要求外交部出面交涉：「唔好再殺牛啦﹗全部送俾我哋養啦﹗」我哋牛真係好感激我哋國家。
。
所以話呢，印度是牛o既天堂，如果下世投胎做牛，最好o黎我哋國家咯﹗千祈唔好去西班牙同中國呀，聽講係呢兩個國家，D牛友唔係俾人「桔」死劏死就係成世辛苦命，唉﹗真係慘無牛道﹗慘無牛道﹗
